Жоғары мөлшерлемелер аясында жаһандық нарықтарға қысым күшейді

🇺🇸 Америкалық қор индекстері сауда сессиясын төмендеумен аяқтады: S&P 500 0,8%-ға, ал Nasdaq 1,1%-ға төмендеді. Сатылымның негізгі триггері АҚШ-тың 10 жылдық қазынашылық облигациялары кірістілігінің жылдық 5,2%-дан жоғары көтерілуі болды. Мұнай бағасының жоғары болуы инфляциялық тәуекелдерді күшейтсе, АҚШ пен Иран арасындағы келіссөздер төңірегіндегі геосаяси белгісіздік тәуекел сыйақысының өсуіне әсер етті.

📉 Мемлекеттік облигациялар мөлшерлемелерінің өсуі дисконтталған ақша ағындары моделі арқылы өсу акцияларының қайта бағалануына әкеліп, олардың ағымдағы құнын төмендетті. Инвесторлар ФРЖ-ның қатаң ақша-несие саясаты ұзағырақ сақталады деп күтуде. Бұл жаһандық тәуекелге деген тәбетті төмендетіп, капиталдың қорғаныс активтеріне бағытталуын күшейтеді.

💻 Nvidia акцияларды кері сатып алу бағдарламасын $150 млрд-қа ұлғайтып, байбектің жалпы көлемін $235 млрд-қа жеткізді. Осы жаңалық аясында компания акциялары 1,7%-ға өсті, бұл ретте кең ауқымды ЖИ секторы төмендеді. Шешімнің негізгі факторы ЖИ чиптеріне жоғары сұраныс аясында операциялық ақша ағындарының рекордтық деңгейге жетуі болды.

🥇 Алтын бағасы 3,5%-ға төмендеп, соңғы өсімнен кейінгі түзетуді жалғастырды. Бағалы металға инфляциялық күтулердің өсуі, АҚШ долларының нығаюы және АҚШ қазынашылық облигациялары кірістілігінің 5,2%-дан жоғары көтерілуі қысым көрсетті.

📊 Тоғыз айдың алдын ала қорытындысы бойынша Қазақстан экономикасы оң динамикасын сақтап отыр. Өсімнің негізгі драйверлері құрылыс, өңдеу өнеркәсібі, көлік, сауда және ауыл шаруашылығы болды. Қаңтар–тамыз айларында құрылыс жұмыстарының көлемі жылдық мәнде 15,6%-ға өсіп, 6,1 трлн теңгеге жетті.

🧩 Ал сауда айналымы 51,5 трлн теңгені құрап, нақты көлем индексі 6%-ға өсті. Тоғыз айдың қорытындысы бойынша Үкімет құрылыс көлемінің одан әрі өсуін, 12,8 млн шаршы метр тұрғын үй пайдалануға берілетінін, өңдеу өнеркәсібі мен саудадағы өсімнің сақталуын, сондай-ақ ауыл шаруашылығындағы тұрақты динамиканы күтеді.

Telegram-арнамызға жазылыңыз — күн сайын сарапшыларымыз нарықтағы идеялар мен болжамдармен бөлісіп, инвесторлардың өзекті сұрақтарына жауап береді.